Agama Ageming Aji

dening : Dayinta Zahra Qonita

 

Udan riwis-riwis sajak adhem ing ati

Sajadah abang kang wus katon tuwa

Dadi papan pasujudan marang Gusti ingkang Kuwasa

Saben bengine

          Mbulan ora pengin mbalik menyang paturone

Lintang uga katon katon kelip-kelip, ora gelem ngalih saka panggonane

          Nanging ibu uwis  lenggah ing duwur sajadah

          Donga lan nyuwun ngapura marang Gusti ingkang murbeng dumadi

Waspa katon tumetes ing pipi

Dongakake  para putra lan para kadange

Aku, amung turu, gumlethak ing duwur papan paturonan,

Kemulan, kadhemen, aras-arasen tangi

          Saben wengi, ibu mesthi nangekake aku

          Nanging kepriye maneh, mata wis ora bisa melek

          Lambe uwis ongap-angop wae

          Kemul uga tansah ngawe-awe

Aku durung sadhar

Menawa pituture ibu iku bener

Agama kuwi ageming aji,

Ngadhemake ati, ngalusake budi,

Nentremake jiwa lan raga,

Sarta gawe endahing bawana.